Aizawl: Tourism Minister Lalnghinglova Hmar chuan Mizoram chu khualzin tlawh chakawma siam piah lamah khualzinte cham rei theihna hmun nise a duh thu, sorkar laipuia Tourism Secretary Bhuvnesh Kumar hnenah a thlen.
Thawhtanni khan Tourism Minister Lalnghinglova Hmar hian New Delhi-ah Kumar chu kawmin Mizoram tourism hmasawnna tur hrang hrang bakah Mizo khawtlang nun pawlh dal loa khualzin dawnsawn theih nana Mizoram sorkar ruahmanna leh hmathlir neihte a sawipui.
Minister chuan, “Mizoram chu khualzin tlawh chakawma siam piah lamah khualzinte cham rei theihna hmun ni se kan duh a. Hei vang hian an lo thlen hlima Aizawl khawpui leh a chhehvela hun rei zawk an hman theih dan leh, chuta tanga Mizoram hmun danga an zin chhuah dan ruahmanna kan siam mek,” tiin khawpui chhehvel khualzin hipna hmuna chei dan turte a sawi.
Tourism Secretary Kumar chuan tun hnaiah Aizawl leh Thenzawl a tlawh thu te, khualzin hip tura theihna a neih san dante a sawi rualin, “Aizawl atanga ban phak maiah khualzin hipa thil lian tham din hi a tul tak zet,” a ti a; sorkar laipui hmachhawp ‘One State: One Global Destination’ project chu khualzin luh tamna ber, riahna leh ei leh in lamna remchang tamna ber Aizawl atanga ban phaka duan tha a tih thu a sawi.
Lalnghinglova Hmar chuan ‘Winter Capital of India’ nih tuma hmalakna a awm mek thu leh a tul anga sorkar laipui puihna an mamawh dante a sawi a, Kumar chuan hun bik tinzawn neia khualzin hip tum chu thil tha leh finthlak tak a nih thu sawiin a office atanga a thlawp tlat tur thu a sawi.