Chief minister Lalduhoma’n Thawhtanni zan khan Union Road Transport & Highways Minister Nitin Gadkari chu New Delhi-ah kawmin Mizoram kawngpui hrang hrang siamna tur a thlen.

An inkawmnaah hian chief minister chuan Aizawl -Thenzawl kawngpui National Highway-a puang tura a lo ngen tawh thin chu a sawipui a, Gadkari-a chuan DPR siam mek a nih thu leh sanction thuai tum a nih thu a lo hrilh.

Mamit to Bairabi NH-06 Spur chu strengthening ti turin chief minister hian ngenin union minister hian sanction nghal a nih tur thu a lo hrilh bakah a senso tur awm ang pawh an sawi dun nghal.

⁠Vairengte to New Vervek NH-306A kawng chhuat siam tha tura chief minister ngenna pawh Gadkari-a hian state PWD ruahmanna (proposal) siam that ngai thenkhatte siam that a nih hnuah sanction a nih tur thuin a lo chhang.

⁠NH-502 Zero to Siaha double lane-a siamsak tura ngenna chu land acquisition man sang lutuk tihhniam dan zawng turin state sorkar a lo ngen let a, sanction thuai tura hma an lak tur thu a lo hrilh bawk.

Chief minister hian ⁠NH-108/NH-44A kawnga Teirei Bridge leh Langkaih Bridge chu Tripura nena inkalpawhna pawimawh a nih avangin lei tha mamawhna a sang hle a, a thawhna tur sum sanction thuai a tul thu a thlen a. Union minister hian DPR siam thata (modified) theh luh ran ni se, MoRTH duh dan ang a nih chuan sanction thuai a ni ang tih chief minister hi a hrilh a ni.

National highway ni thin, double lane alignment thar a kal tak avanga ngaihsak zui lohva awm, state PWD-a la hlan fel si loh kawngpui pawimawh parukte One Time Improvement chungchang a sawipui a. Gadkari-a hian national highway hlui an nih ngei chuan sanction-a resurface tur a nih thu chief minister hi a lo hrilh.

⁠Mizoram chhunga kawngpuite an lo tlo zawk nan kawngpui project tharte chu concrete road-a siamsak tura a ngenna chungchangah Gadkari-a hian cement factory lian nen inbe rema a man tlawm deuh zawka leia concrete road siam theih a rinawm thu sawiin, MoRTH leh NHIDCL officer-te pawh bitumen man 40% laia a to tak avangin ngaihtuahna senga hma la turin a hrilh nghal.

Zan hnih riah hnuah Mizoramah kir

Zan hnih riaka New Delhi-a zin, Chief Minister Lalduhoma chuan Thawhlehni khan Aizawl a lo thleng.

New Delhi-a a cham chhung hian chief minister hian Parliamentary Affairs leh Minority Affairs Minister Kiren Rijiju a kawm a, PMJVK hnuaia Mizoram sorkar project ngaih pawimawh 23-te a theh lut a. Union minister hian a vaiin a lo pawm.

Dr. VK Paul, NITI Aaayog Member kal chhuak tur pawh a kawm a. An inkawmnaah hian Tourism Minister Lalnghinglova Hmar pawh telin Niti Aayog leh Mizoram sorkarin Tourism Conclave an buatsaih dun tur chungchanga hmalakna hi an thlir a. May thla chawhnu lamah Delhi-ah pre-conclave meeting neih an rel a ni.

Niti Aayog hian Mizoram tourism policy changtlung zawk duan dan tur te, Mizoram puala Institute of Hotel Management-Ashok (IHM-A) hnuaia a thlawna training neih theih dante leh investor koh luh chungchangte chief minister leh tourism minister hi an sawipui bawk.

Chief minister hian Thawhtanni zan khan Union Road Transport & Highways Minister Gadkari a kawm bawk.