Aizawl: Chief Minister Lalduhoma hova Neihloh Village Planning Committee thukhawmin Neihloh khaw thar tur Master Plan an thlir ho.
Neihloh khua hi a khaw puma leilung chetna hmun, khuarel chhiatna avanga him tawk tawh lo a nih avangin an khaw ram chhung hmun danga insuan mai thain a khaw mipuite leh sorkar chuan a hria a. Hmalakna pawh eng emaw chen kalpui tawh a ni. A khaw hmun thar tur an vat fai tawh a, khaw chhung inkalpawhna kawng laih tan tawh a ni a. Mipui ni tin mamawh petu department ten eng emaw chen hma an lo la tawh bawk.
Khaw thar hi Hectare 60 biala zau tura duan, plot 105 nei, plot tin hi square meter 800 aia zau vek an ni. Plot pakhat chhungah in pakhat bak sak phal loh ni se, in hi sak belh dawn chuan plot tharah zel dah ni se an ti a. A khua hi tihzauh zel theih tura duan a ni.
Nilainia CM Conference Hall-a thutkhawmah hian Master Plan thenkhat an siam danglam hnuah a pawm a. Hma latu tur Nodal Agency an ruat nghal a. State Level-ah chuan Planning & Programme Implementation Department te ruat an ni a, District Level-ah Serchhip DC chu ruat a ni.
Neihloh khuaa chhungtinte chu an in thar sakna tur Rs. nuai 15 pek vek an ni dawn a. Sum leh pai hman belh tur nei ten lian zawk leh tha zawkin an chenna tur in hi an sa ang. In sak dan tur hi a hniam lam bituk siam sak vek a ni thung. Chhungkaw thenkhatin in sak tan an duh tawh avangin mamawh hmasate chak taka bawhzui ni se an ti.
Neihloh khua hi kum 1898 a din a ni a. Tunah hian chhungkaw 77, mihring 400 chuang hlek an awm mek a. Aizawl Thenzawl Lunglei kawngpui atanga tehin an khaw thar tur hi khaw hlui aiin a hnai zawk.
Master plan hi pawm a nih chuan Mizoram Urban & Regional Development Act 2025 hnuaia Notification tihchhuah a ni ang.