Aizawl: Taxation Auditorium, MINECO-ah Information, Communication & Technilogy (ICT) department buatsaihin nimin khan Mizoram sorkar hnuaia department hrang hrang leh zirna inte tana buatsaih ‘Government Online Excellence Awards, 2025’ sem a ni a. ICT Minister Dr. Vanlalthlana chu khuallian niin award a sem.
Khuallian Dr. Vanlalthlana chuan innovation leh mipui rawngbawlna lama official-te thawh rah lawmna hun pawimawh tak an hmang thei chu lawmawm a tih thu a sawi a. IT hmasawnna avanga mipuiin awlsam zawka tui, electric leh phone bill te an pek theih tawh thu sawiin, mipuite awlsamna tura online service pek chhuah kawngah an huang zauh zel turin kalkhawmte a chah.
ICT hmalaknain Mizoramah Artificial Intelligence Center of Excellence (AI-CoE) din tura proposal siam a nih tawh thu leh district zawng zawnga mobile/internet connectivity tha a awm theih nan Mizoram Fibre Grid Network thawh mek a nih thu Minister hian a sawi bawk.
Government Online Excellence Awards dawngtu tur thlangtu turin Selection Committee leh Technical Evaluation Committee siam niin, hengah hian ICT technical expert mai bakah MZU, NIC leh NIELIT atangin mithiam an tel a. Official Departmental Website ah website 160 endik niin, Educational Institution Website atan hian website 50 endik an ni a. Endik zing atang hian Top 10 te hnenah lawmman hi hlan an ni a, pakhatna atanga pathumna te hi Citation leh Momento pek theuh an ni a, palina atanga 10-na te hian Citation an dawng theuh bawk.