Aizawl: Aizawl Bawrhsap leh Aizawl District Disaster Management Authority (ADDMA) Chairman Er. Lalhriatpuia, thupek angin Nilaini khan Chanmari leh Ramhlun South inkar Laldenga Road kopang lung tla thei hlauhawm zualpui chu thenfai hna thawh a ni.
Aizawl DC leh ADDMA te hmalaknain Disaster Management-a Quick Response Team ten mipui him nan kopang lung tla mai thei te lawn chilhin thenfai a ni a, thing tla mai thei te thlak a ni bawk. Hnathawk hi Zonal Officer te pawhin enpuiin, an tawiawm bawk.
Helai hmun leimin leh lung tla hlauhawmna hmun hi May ni 1, 2026 khan thenfai tum a ni tawh a, mahse khua a chhiat nilen tak avangin kopanga lawn te a ngai sia an thawk thei ta lo a ni.
Tuna an hmalakna a zawh hnu hian Geo Rock Wall hmangin thirlen hmangin he kopang hi an tuam leh tura ruahman a ni.