Mizo Zirlai Pawl chuan tun hnaia Mizoram sorkar hnuaia hnathawk pension tawh rawih nawn (re-employment) awm chungchangah rawih nawnna order chu May 14, 2026 ral hma ngeia sut turin sorkar thuneitute an ngen.
Ningani khan MZP chuan Mizoram sorkar hnuaia hnathawk pension tawh rawih nawn tun hnaia awm chungchang ngaihtuahin executive committee thutkhawm an neih zawhah Aizawl Press Club-ah thu thar thehdarhtute an kawm a, tun hma atangin pensioner rawih nawn hi nasa taka dodalin duh lohna lantir a lo ni tawh thin a, tuna pensioner chungchangah pawh hian an ngaihdan a la ngai reng tih an sawi.
MZP chuan sorkar hnathawk ruai nawn lo tura thuneitute an ngen reng laia an ngenna ngai pawimawh lova a ruai nawn hi Mizoram mipuite leh thalai hna zawng mekte zah lohna leh hmusitnaah a ngai a. Pension rawih nawnna order chu May 14, 2026 (Ningani) ral hma ngeia sut turin thuneitute an ngen.
MZP chuan sorkar hnathawk pension rawih nawn awm fo thin chu tun hma atangin tha a tih loh thu a lo au chhuahpuiin pension tawh rawih nawn an nih avanga bang tura nawr pawh a lo nei tawh thin a, chutiang thil thlen ngai lo tur chuan thuneitute pawh a tul anga hma la tura ngen nawnin, sorkar hnathawkte chu an hnathawh hun chhunga thahnemngai taka thawk turin leh an pension hnuah erawh thalai hna zawng mekte kian turin a duh takzet tih an sawi.