Premier League nomawi lo la tawh leh khawvela goal thun thei ber pawl, Alan Shearer-a chuan tuna hmahruai mektu, Arsenal chu an hmabak inkhelh tur la awmah an chak vek leh nomawi an lak ngei a rin thu a sawi.
Premier League season tawp lam a ni mek a, Arsenal leh champion lai, Manchester City chu champion nih tuma inumin theihtawp an chhuah mek a, nomawi la zawk nih an tum hle.
Kum 22 hnua champion leh tum, Arsenal dinhmun a tha rih zawk mek a, khelh hnih an la neihah point ngaa sang falin City hian khelh thum an la nei thung a. Tu zawk tan mah inthlahdah emaw, point hloh emaw a thiang tawh lo.
Khelh hmabak tlem tawh takah hian la inlehpel thei an nih miau avangin point tinte chu a pawimawh zual zel a ni.
Arsenal hian Pathianni zana si khat faia West Ham United an hneh hnuah tla chiang tawh, Burnley an mikhual ang a, Crystal Palace tlawhin an zin chhuak zui leh dawn a. Heng inkhelte hi league nomawi an la thei dawn nge dawn lo tih hril tura pawimawh tak vek an ni tawh a, chak ngei ngei a tul tawh hlawm.
England striker hlui, Shearer chuan Arsenal chu an khelh hmabak pathumah hian chak vek thei dinhmunah an ding niin a ngaih thu a sawi a, Pathianni zanah pakhat an hneh tawh phawt.
Blackburn Rovers tana nomawi lo la tawh leh Newcastle United player hlui, Shearer-a chuan, “Arsenal hian an khelh hmabak pathumah hian hnehna an chan vek ka ring a. Han ngaihtuah chian chuan Mikel Arteta leh Arsenal player-te hian club legend ni kumkhua turin vawi li chiah khelh hmabak an nei tawh a. Champions League leh Premier League nomawi an la thei ve ve a. Premier League-ah vawi thum an chak chuan a zo a ni mai a, Champions League-ah vawi khat chak bawk se champion an ni mai bawk a. Inkhel pali chiah a ni tawh,” tiin a sawi.
Beiseina sang tak awm mah se Arsenal hian inthlahdah chi a ni lo tih an hre chiang hle a. An khingpui turte hian tlakhniam loh nana bei, season thara Europe inelnaa tel tuma thapui thawh lai leh league-a dinhmun tha zawk chan nana theihtawp chhuaha beih an la tum ve theuh dawn a, kawng awlsam a ni hlawm dawn lo.
An hmabakah hian rilru pek a pawimawh hle dawn a. Hetiang khawpa nomawi inchuhna khauhah hian inthlahdah hlek a pawi theih hle rualin City-in na takin an la nawr mek bawk a, engmah chiang a la awm thei lo.