Aizawl: I&PR Director K. Vanlalsangi chuan Lawngtlai tlawhin, District Information & Public Relations Office (DIPRO), Lawngtlai Zonunchama Ralte leh a thawhpuite bakah, Mizoram Journalist Association (MJA), Lawngtlai hruaituten lo dawngsawngin an inkawm nghal.
Director K. Vanlalsangi chuan DIPRO Office leh tualchhung chanchinbumi (MJA) te inkarah thawhhona tha tak a awm reng chu lawmawm a tih thu a sawi a. Sorkar thuchhuak dik tak mipuia thehdarh leh, department hrang hrang hmalakna puanzar kawngah I&PR department chu mawhphurhna laipui chelhtu an nih thu a sawi.
“I&PR leh Media-te hi ram leh mipuite tana innghen tlat, thawkho tur kan ni,” tiin, sorkar rin tlaka thawk tur leh district mipuite tana theihtawp chhuah chhunzawm zel turin hnathawkte leh MJA Lawngtlai te a chah.
MJA, Lawngtlai hruaitute pawhin Director-in an district a lo tlawh thei chu hmasawnna kawng hrang hrangah rah tha a chhuah ngei an beisei thu an lo hrilh a. Sorkar hmalakna leh mipuite hriat tur pawimawh thehdarh kawngah I&PR nen hian kut suih tlat an nih thu leh, ram leh hnam siam that kawngah thahnemngai taka hma an lak dun zel tur thu an sawi bawk.
K. Vanlalsangi hian DIPRO Office, Lawngtlai hmunhma leh an building-te a enfiah a, thawktute harsatna leh hmasawnna turte a sawipui a ni.