Aizawl: Health & Family Welfare Minister Lalrinpuii chuan Thawhtanni zingkar khan Lunglei Electric Venga Animal Husbandry & Veterinary Department hnuaia slaughter house (sa talhna in) chu a hmunah tlawhin, tangkai zawka hman theih dan tur a enfiah.
Slaughter House a tlawhnaah Lunglei East bialtu MLA in bawk Minister Lalrinpuii chuan, ran talh avangin natna hrik inkai theih tam tak a awm a, khaw chhunga sa talh mai mai chu a him lovin, a hrisel lo tih sawiin, Lunglei khawpuia mihring pung chho zel avang leh Lunglei Municipal Corporation (LMC) a lo din tak avangin inkaihhruaina fel tak nen sa talhna in chu hman tangkai dan ngaihtuah a tul tih a sawi.
Sa talhna in chu Lunglei mipuiten sa thianghlim leh hrisel an ei theihna atana tangkai tak tur a nih thu sawiin, sorkar thuneitute leh department lam nen tanghovin a hma thei ang bera hman theih turin hma lak an tum thu a sawi bawk.
Slaughter House hi kum 2013 khan AH & Vety Department-in a sak bul tanin, kum 2015-ah hman theiha sak zawh fel a ni a. Chhan hrang hrang avangin hman tangkai lohvin a awm zui a. Hei hi Minister nia, bialtu MLA ni bawkin veiin, a enfiah a, tangkai taka hman a nih theih nana hma la turin LMC hotute, AH&Vety Department leh sa talhtute chu khunkhan takin a sawipui nghal a ni.