Aizawl: Mizoram Pradesh Congress Committee (MPCC) chuan nimin khan Congress Bhavan, Aizawl-ah Political Session an hmang a. He hunah hian MPYCC Sr. Vice President Ngurdingpuia Pachuau chuan thu sawiin tun sorkar kalphung thlirin mipuiin sorkar tha leh dik, innghah ngamna tak tak an beisei chu pe thei turin Congress Party chu theihtawp chhuahin an inbuatsaih mek tih a sawi.
Ngurdingpuia chuan mipuiin Congress chu thutiama ding nghet leh ram tana hmasawnna hnuchhiah hnem ber, hruaitu tha tak tak nei a ni tih an hriat reng lai pawha, tun hnaia inthlan hrang hrangah mipuiten an la thlang tawk lo chu an enfiah a ngai tih a sawi.
Aizawl Municipal Corporation (AMC) inthlan chungchangah manifesto tha tak tak nei mah se, party pumpui anga mipuite’n an chunga rinna leh beiseina an la nghah ngam loh chhan chu an enfiah a ngai tih sawiin Ngurdingpuia chuan, “Mipuiin MNF an la chhangkham rih bawk nen, ZPM thlakna tura mipui ‘choice no. 1’ ni turin Congress chu an inbuatsaih a pawimawh hle,” a ti.
Congress party chuan ram hmasawnna atana theihtawp chhuah reng an nih thu sawiin, ZPM Healthcare (MUHCS) aia tha zawk siam leh, sorkar sikul-a mahni fate dah ngamna khawpa zirna (Education System) siam that an tum thu te, lehkhathiam hna nei lo leh thalai hnathawh tur mumal nei lo te tana ruahmanna felfai tak an riam mek thu te, hmeichhia, kum upa (senior citizen), hmeithai, rualbanlo, leh eizawnna bulfuk nei lote tana hamthatna ruahmanna an siam mek thu leh thingtlang kuthnathawktute leh infiammite tana chhawmdawlna leh hmasawnna tur an duan mek thute sawiin, “Mipui nawlpuiin sorkar tha leh dik, innghah ngamna tak tak an beisei pe tur hian theihtawp kan chhuah mek a ni,” tiin MPYCC Sr. Vice President chuan a ti a ni.