Aizawl: Chief Minister Lalduhoma’n DoNER ministry Secretary Sanjay Jaju chu a chenna inah a kawm.
An inkawmnaah hian chief minister hian Sustainable Cultivation of Mizo Ginder USP NEC fund tur approved a nih avangin secretary hnenah hian lawmthu a sawi a. Mizoramin sawhthing a thar that bakah a quality a thain a thianghlim avangin NITI Aayog pawhin Ginger Capital of India-ah a puang hial tih sawiin, he fund hi sawhthing chingtute tan a tangkai hle dawn tih a sawi.
Chief minister hian 10% GBS mumal zawk leh langtlang zawka kalpui a nih theih nana hmalak a tul thu DoNER secretary hi hrilhin secretary hian lo en zui a tiam a, hei bakah hian NESIDS (Roads) hnuaia Khankawn – Rongura Hmun hi 1.70 km vela sei laih belhin Thenzawl Buarpui Intermediate Lane a pawh thei dawn tih chief minister hian sawiin, a laih zawmna ngaihtuahpui turin secretary hi a ngen bawk.
Jaju hian Thenzawl Golf Resort tihchangtlunna atan private investor-te an luh theihna tura hma lak a tum thu chief minister hi hrilhin, Mizoram sorkar pending DoNER scheme project thenkhatte an sawi dun bawk.