Aizawl: Tawngtai Bethel Camping Centre (TBCC), Sakawrtuichhuna in sak thar, ‘Josepha Room’ chu Thawhtanni chawhnu khan Food, Civil Supplies & Consumer Affairs Minister B. Lalchhanzova’n a hawng a. Pastor Lalremruata’n Pathian hnenah a hlan.
Josepha Room hawnna inkhawl hi Central YMA Vice President Prof. Lalnuntluanga’n a hruai a. Er. H. Duhkima, Treasurer, Central YMA-in sak a nih dan report a pe.
Minister chuan TBCC-a awm mekte hnenah ruihhlo avanga Mizoram a rum laia Central YMA leh TBCC dintu chhungkuain a langsar lo lama rawngbawlna hlu tak an thawk chu fakawm a tih thu a sawi a; ruihhlo laka harsatna tawka awm mekte fuihin ramin a mamawh avangin chhia leh tha hriatna hmang tur leh a der tal pawha felna atanga bul tana nungchang thlak tlat turin a chah a, Supply Department leh WIC Scheme atangte pawha theihtawp a lo chhuahpui a tum thu a sawi bawk.
Central YMA President R. Lalngheta pawhin thu sawiin ruihhlo laka harsatna tawk mekte chu ‘drugs addict tura piang bik an nih loh thu a sawi a, dam leh thei a ni tih hriaa rilru fim nen ngaihtuahna thar hmang turin a chah a; ruihhlo do kawngah ‘hmangaihtu der’ an chhuah thin avangin mipui an mangang thin tih sawiin, kuminah Pathianin boruak thar tha zawk a pek lai hian Central YMA chuan ruihhlo bawiha tang mekte chhanchhuah nan theihtawp chhuah an tum thu leh khawvel dam chhung rei lo teah mi dangte tana malsawmna ni tura chhuak turin a fuih a ni.
In sak thar hi a dung Ft 60 leh a vang Ft 24-a lian a ni a, hei bakah hian choka, inthiarna leh venbuk pahnih, infiamna tur kawt zawl zau a awm a. Rs. 13,59,822 sen a ni.
In dang pahnih sak leh a ni dawn a. A sakna hi chief minister, home minister leh excise minister te ruahmanna atangin sorkarin a tum a, Central YMA-in a sak hna a thawk thung.
A hawnna hunah hian TBCC dintu, Zohmingthanga pawhin thu a sawi a. An hmunah hian mi 673 an awm mek.