Chief Minister Lalduhoma chuan Thawhtanni khan Assembly Annexe Building Conference Hall-ah, 166 Infantry Battalion Territorial Army (Home & Hearth)-a thawk tura thlan chhuah, Mizo thalai mi 144-te a vai liam.
Heng thalaite hi TA-a Mizo thalai thlan chhuah hmasak ber an ni a, mipa 135 leh hmeichhia pakua an ni.
Inkhawmah thu sawiin chief minister chuan tun tuma hna lak chu a bul tanna chauh a la ni tih a sawi a. Hna ruak dang 300 pawh la awmin, a tahtawla lak tur a ni tih a sawi a. “Vawiin hi Mizoram tana ni lawmawm leh chhinchhiahtlak a ni,” tiin, TA-a Mizo Battalion (Home & Hearth) neih a nih theih nana central sorkar thuneitute hmalakna chu fakin a tirah mi 70 lak phal a nih laiin dil belhna avanga mi 144-ah tihpun a ni chu lawmawm a tih thu a sawi.
Chief minister chuan he hlawhtlinna kawnga Prime Minister Narendra Modi, Union Home Minister Amit Shah, Defence Minister Rajnath Singh leh Chief of Army Staff General Upendra Dwivedi-te chungah lawmthu a sawi a. “Mizo thalai, a tam thei ang ber hi lut se, eizawnna a nih piah lamah ram venhimna hna zahawm tak a ni,” tiin lak belh leh an nih theih nan hma an lak mek thu a sawi.
Lalduhoma chuan hna an lak leh dawnah chuan tun aia fimkhur lehzual zawka an kal tur thu a sawi a. India khua leh tui an ni tih finfiahna document hrang hrang, ration card thlengin an phut tawh dawn tih a sawi a. Sipai training zote chu an awmna tur tak tihchian la ni lo mah se ramri depah an awm a rinawm tih a sawi bawk.
Home Minister K. Sapdanga pawhin thu sawiin, thalaite chu inpekna leh thawhrimna nena hun hmang turin a chah a, mahni leh chhungkua chauh ni loin Mizoram aiawh an ni a, an chet dan chu India hmuha Mizote pho chhuaktu an ni tih a sawi.
Heng thalai mi 144-te hi Zirtawpni hian Shillong panin an chhuak ang a, chuta tangin an training-na hmun tur an pan leh dawn a ni.
He hunah hian TA Establishment & Coordination Committee Chairman Lt. Col. (Retd) Clement Lalhmingthanga, MLA; Home Secretary Vanlalmawia; TA Group Eastern Command Commander Brig. Manoj Kumar Patel, Shaurya Chakra leh Armed Forces leh Assam Rifles officer pawimawh tak takte an tel bawk.