Aizawl: Commerce & Industries Minister F Rodingliana chuan nimin khan The Salvation Army, Modern English Higher Secondary School Felicitation Day a hmanpui a. He hunah hian kum 2025-2026 chhungah HSLC leh HSSLC zirlai titha te hnenah lawmpuina thilpek hlan.
He hunah hian thu sawiin Minister F. Rodingliana chuan, Modern English Higher Secondary School chhuak a nih ve thu a sawi a. Tunlai khawvelah chuan mi zawng zawng hi sorkar hna hian a daih seng tawh lo va. Zirlaite pawh ram tan mahni kuta ding chhuak thei tur khawpa thiamna zir chhuak turin a fuih.
F Rodingliana chuan zirlaite chu malsawmtu tel lo chuan thawhrimnate, thiamna te hian awmzia a nei lo va, malsawmtu an hriat reng a, Pathian tih chungah zirlaite chhunzawm zel turin a fuih a. Zirtirtute pawh naupangte hlawhtling tura an thawhrimnaah fakin, tun hma atanga Aizawl school tha lar hmasa pawl a nihna te chu chhawm nung zel turin duhsakna a hlan.
Modern English Secondary School hian kumin HSLC result chhuakah an zirlaiten hlawhtinna an chang vek a, hei hi a zawna kum thum chhung zirlai zaa za pass an neihna a ni. HSSLC Commerce-ah hian zirlai 21-in exam an bei a, an pass vek bawk. He’ng zinga an zirlai Lalbiaktluangi chu mark 426 hmuin Mizoram pum puiah 10-na a ni. Arts lamah zirlai 73 neiin 65 an pass bawk.