Khawvelin a buaipui hri leng mak danglam leh ngeiawm zet, mi tam tak nunna latu ni bawk Covid-19 hi a la reh fel lo a, kan fimkhur a la ngai reng.
Puitling tam zawkin a invenna vaccine la tawh mah ila, fimkhur tluk a la awm chuang lo a, thawm a neih loh vang vang hnuah tunah hian a rawn leng thar leh mek.
May 12 thleng khan Covid-19 vei thar hi Mizoramah mi 51 an awm leh der tawh a, mahse a enkawltu lam chuan ngaihtuahawm an nih loh thu an sawi.
A buaipuitu leh helam kutkentu bikte sawi danin nikum chhung khan he hri vei hi mi 40 an awm a, kuminah erawh kum chanve em pawh kan kai hmain nikum kan khum leh der tawh a ni.
Mithiamte sawi dan chuan hri vei zat hi pung hluai mahse, hri a hluar tihna erawh a ni lo a, hriatchhuah thar hi an awm fo tura an ngaih thu an sawi.
Hri leng hi reh fel hmak a la ni lo tih a chiang a, mitin kan fimkhur thar lehzual a, invenna kan hriatsa hrang hrang a theih anga kan zawm hram hram zel pawh a tha awm e.