- Hmingsanga
A sawi uar deuh phei chuan League title lak aiin Derby a chak a thlanawm zawk te an ti hial. Thu an uar deuh mah mah e kan ti a nih pawhin, he inkhel pawimawh zia leh chak hlut zia an sawina pakhat a ni ber e
El Clasico – Real Madrid vs Barcelona (Spain) Superclasico – Boca Juniors vs River Plate (Argentina), Derby della Capitale (S.S Lazio vs A.S Roma) Derby of the Eternal enemies (Olympiacos vs Panathinaikos) The Old Firm Derby – Celtic vs Rangers (Scotland) leh derby dang te football khawvelin a nghahhlelh tluk zetin, Indian football a derby ropui ber leh hlut hlawh ber; Kolkata derby nizan khan kan en ta ngei a. Kolkata derby hi football khawvelah a nep bik hauh lo a, FIFA pawhin classic derby list ah Kokata derby hi a tarlang ve nghe nghe.
Kolkata Derby ah hian khawvel hmun hrang hranga Bengali mipui hi hlawm hnih lian tak pahnihah an then phawk a, chu chu East Bengal tan tu leh Mohun Bagan tantu tiin an tarlang thin. Mohun Bagan tan tute hi Bengali ah rau rau pawh thlahtu te atanga ‘awm hlun’ deuh niin an inchhal a, East Bengal tantu lam hi ‘ pem khawm’ deuh nia sawi an ni bawk. Asia khawmualpui a football club upa ber Mohun Bagan atanga ‘ti tau’ chhuak ten East Bengal hi an din a nih avangin an inkhel boruak hi tun thlengin a la ‘ tang’ tha et awt viau a. Football ngaina tu tan erawh hmuhnawm a tling leh ngei ang.
Pathianni zan inkhelah Mizo tlangval Edmund Lalrindika chuan goal ‘class’ lutuk a thun a nih kha. Edmund Lalrindika football zin kawng hi sawi zui lawk teh ang.
Doctor pahnih a rawn te chuan “Football i khel thei tawh lo ang” an ti a. A pathumna erawh chuan beiseina chhe te a neih tir, chu pawh Football nilo ” Badminton emaw tennis emaw i khel thei mai thei” a la ti chauh a. Doctor te thurawn ang chuan a inkhelh theih a beisei awm tawh lo. Beidawng duh lo Edmund -a chu thla 18 hnuah khelmualah a lo kir leh ngei a, bei ti dawng zual turin, Bengaluru FC in Durand Cup-a a chet that tawk loh avangin a contract tihtawp sak zui.
Edmund chuan “Zai ka nih hma khan ka chhungte kha an mangang em em a. Doctor-te thusawi kha an hre vek si a. Mahse ka farnu bulah, ‘I unau pa hian football a khel leh dawn, Kristian ka ni a, Pathian ka ring a, Pathianin mi ti dam ang a, chakna min pe ang,” tiin March 7, 2022-a zai tura an nawrluh hma lawk khan heng thu hi a sawi.
“Bengaluru FC -in ka contract an ti tawp kha ka hrethiam, Club lian a nih avangin khelhna hun tam ka hmu lo a, mahse an facility leh doctor thiam tak tak te vanga tun hun hi thleng leh thei ka ni,” tiin lawmthu a sawi.
A inkhelh theih hnuah ISL club atangin I League club Inter Kashi a zawm a, Game 22 khelin, goal 4 a thun a, assist vawi 8 a nei bawk a. Inter Kashi chu ISL khel turin a tlin pui zui bawk. Hetih lai hian National team ah pawh Edmund Lalrindika hi I League player an koh awmchhun a ni nghe nghe.
Edmund Lalrindika hi age level a India captain te pawh lo ni tawh thin a ni a, a football zinkawng hi a chhuk chho ve hle a. A tumruhna leh a inpekna hian tun dinhmun hi hruai thlengin, India senior team tan pawh vawi 6 lai a inlan tawh a. Hun rei tak ISL a chanchin nei tha tawh lo East Bengal hi a champion pui ngei a beiseiawm.