Aizawl: BJP Mizoram chuan an party pisa-ah kar thar inhlanna leh political session hun an hmang a. He huna thusawitu State Vice President Lalduhawma Pachuau chuan ram dang tharchhuah aiin ram chhung thil thar chhuahte an lei a, an ngaihsan a pawimawh thu Prime Minister Narendra Modi-a sawite hi Mizoram mipuite pawh hian theih ang anga an tawm ve a ngai tih a sawi.
Lalduhawma Pachuau chuan PM Modi-a’n India mipuite hnenah foreign exchange humhalh tur leh ram dang atanga mamawh lakluh tihziaawmna tur, khawvel puma supply chain tihbuai karah economy humhalh tura ngenna pawimawh pasarih a siam te, tuialhthei hman tihtlem a, mipuite thinlunga vantlang lirthei, metro network emaw carpooling hman tangkai a pawimawh thu te, rangkachak lei nana sum hman loh te, ram danga zin chhuah loh te, eirawngbawlna gas hman tih tlem te, leh loneituten ram dang atanga chemical fertilizer emaw leitha lakluh lohva, Natural Farming lam tih uar thar a sawite chu Mizoram mipuite pawh hian theih ang anga an tawm ve a ngai tih a sawi.
BJP State Vice President chuan Mizoram Universal Health Care Scheme (MUHCS) ah inziah luhna hniam ber pawh rethei tak tak tan chuan tih ve theih rual a nih loh avangin, PM Health care (Ayushman Bharat) hre chiang a, la inziak lut lote an awm chuan inziah luh ngei a pawimawh tih a sawi.
Lalduhawma chuan BJP-in Viksit Bharat 2047 a thlen a tum avangin central-a an hotute chuan theihtawp an chhuah mek a, BJP chuan hmasawnna hi an ngaih pawimawh ber a nih thu leh India mi tu pawhin an chanvo an chan tur ang an chan ngei theih nan a hmalak zel hi an thupui a nih avangin, Mizoram mipuite pawhin chu chanvo chu an chan a an hmuh theih nan theihtawp chhuah a tul tih a sawi bawk.