Manipur-a Kangpokpi district-ah ralthuam keng pawlten mi an la hrente chhanchhuah tumin venhim hna thawktuten beihpui an thlak tan niin police-ten Thawhtanni khan an sawi.
Tlangram district-ah hian hmun hrang hrangah huam zau takin zawn beihpui thlak a ni bawk a, ‘mi bo zawng zawng chhanchhuah leh hrengtute man an tum’ tih officer pakhatin a sawi.
Kangpokpi leh Senapati district-a ralthuam keng pawlten an man, Kuki leh Naga 38 vel zinga 31 chu Ningani leh Zirtawpni khan chhuah an lo ni tawh.
Heng mite hi Nilainiaa Kangpokpi-ah firfiak nia rinhlelhten kohhran hruaitu pathum an kah hlum bakah mi dang pali an hliam leh Noney district-ah civil mi pakhat kah hluma a nupui hliam bawk hnu atang khan an chin hriat an ni lo.
Police thuchhuah chuan, “Mi bo chhanchhuah hna thawh chhunzawm zelna atan hian Kangpokpi district-a Leilon Vaiphei leh Kharam Vaiphei khuaa hmarthlang lam tlangdungah venhim hna thawktuten zawn leh dap beihpui an thlak a ni,” a ti.
Kar kal taa venhim hna thawktute kutah hlana chhuah zingah hian Kangpokpi-a Konsakhul khuaa Naga hmeichhia 12 leh Senapati district-a Kuki mipa pali leh hmeichhia 10-te an tel.
Hemi hma hian police-te chuan sorkar, venhim hna thawktu, politic hruaitute leh mipui kaihhnawih pawlte ‘inpumkhatna’ avang hian ‘civil mi man zinga a tam zawk, hnam hrang hranga mite chu him taka chhuah an nih thu’ an lo sawi tawh a ni.
Hetihlai hian state chhunga Naga hnam pawl chak ber, United Naga Council chuan Pathianni zan atang khan National Highway 2 leh 37-ah district inkalpawh theih loh nan danna an siam a, helhovin an mani nia hriat Naga paruk chhuah an phut.
State chhunga Kuki hnam pawl chak ber, Kuki Inpi Manipur pawhin Senapati district-a mi 14 chin hriat loh an awm thu leh pawl hrang hrangin man thu an sawi bawk.