Lirthei nei kan pung zel a, fimkhurna chang hre lo tam tak kan awm ta nual bawk. Lirthei kan khalh dawna dan zawm tur a awm tih pawh hre lo kan tam leh hle tawhin a lang.
Tunhnaiah lirthei hmanga chetsualna leh nunna hial chan phahna thil hrang hrang kan hre chho a, a tam zawk phei hi chu fimkhur loh vang liau liau a ni.
Lirthei kan khalh chhuah dawn hian dan hnuaia awm kan ni tih hi kan hriat thar a tul hle a, zan a ni emaw, khaw en lai a ni emaw englai pawha fimkhur reng tur kan ni.
Lirthei khalhtute zingah kawngpui chhinchhiahna leh khawhawi zawng kawhna hrang hrang pawh hre lo an awm ta fo mai hi a pawi a, a endiktu lam pawh hian enchik leh enfiah hna hi ngawrh zawkin nei thei se a duhawm hle.
Dan hriat loh hi inchhanhimna a tling lo a, hremna a nep lo hle bawk tih kan hriat thar a, kumtling lo lirthei khalh leh rui chunga lirthei khalh mai bakah, midangte tana hlauhawm khawpa lirthei khalh hi hremna na tak a tling tih kan hriat thar a tha viau.
Thuneitu lam pawh hian lirthei an enfiah uluk a, dan dik lo leh thuzawm lote man tura tan an lak thar a tul hle ta mai.