Manchester United captain Bruno Fernandes chuan Declan Rice-a’n Arsenal zawm a thlang ta kha pawi a tih thu a sawi chhuak.
Rice hian kum 2023 khan West Ham United atangin £ maktaduai 105-in Arsenal a zawm a, Mikel Arteta naute chu nomawi chuh pha turin a pui a ni.
Arsenal hian 2003-04 hnua a vawi khat nan Premier League nomawi la turin vawi hnih khelh chiah hmachhawn tur an nei tawh a, tun thla tawpah hian Champions League final-ah Paris Saint-Germain an hmachhawn bawk ang.
Fernandes ang bawkin Rice pawh hi Premier League Player of the Season dawng tura chhawpchhuah zingah a tel a, England midfielder hi Arsenal-a a awm hnua a season thum a hman tawhah he lawmman dawng thei tura thlan chhuah zingah a tel ziah a ni.
Tun season-ah Rice hi Arsenal outfield player zingah league-a minute khel hnem ber a ni a, expected assists leh minute 90 zela ball chan let hnem lamah hmahruaitu a ni bawk.
Arsenal a zawm hmain Rice hi Manchester City pawhin an duh hle niin tar lan a ni a; mahse, Fernandes-a erawh chuan Old Trafford a pan ve ngei a beisei thin a ni.
JoelBeyaTV Youtube channel-a an kawmnaah Fernandes chuan, “Sawi tlang tawpah chuan Declan hi ka ngaisang lutuk. Algarve-a kan training ho thin lai atang tawh khan ka hre tawh a. West Ham-a a awm lai atangin ka hre chiang tawh a, a theihna kan hre vek a, Manchester United-a khel awm tak a ni tih hi ka sawi fo thin,” a ti.
“Arsenal a pan ta kha pawi ka ti hle a, Manchester United rawn zawm theihna hun remchang a awm leh awm loh chu ka hre lo; mahse, kan club tan hian a inhmeh ber turah ka ngai thin a. Player a nihna vang ngawt ni lo, a mihring mihrinna leh a professional zia hian a mizia a tar lang a, tun season-a a thil tih hi position dang a ni a, khelh dan phung pawh a dang a ni,” a ti bawk.
A sawi zelnaah, “Arsenal khelh dan hi kan khelh dan nen a inang lo va; chuvangin, player-te hi kan khaikhin thei lo. Mahse, kan sawi theih chu tun season Premier League-a player langsar berte zinga mi a ni tih hi a ni,” a ti.