Sean Strickland a hneh loh hnuah khan Khamzat Chimaev-a chuan innuai nawn leh nghal bak thil dang duh a nei lo tih a sawi.
Chimaev-a team chuan, “Sean Strickland-a nena innuai nawn leh hi Khamzat-a’n a duh awm chhun a ni a, a vei bur mai a ni,” an ti.
Newark, New Jersey-a UFC 328 neihah Chimaev-a (15-1) hian UFC middleweight championship kawnghren chu Strickland-a (31-7) lakah a hloh va. Round nga an insualnaah hian an inhnehtawk hle a, judge pahnihin Strickland chu 48-47-in an chaktir a, judge pakhat dang ve thung chuan Chimaev chu 48-47 in a chaktir thung.
An innghirngho vanga innuaina hi kumin chhunga fight lian berte zinga mi a ni a. Fighter pahnihte an inkar a that loh em avang hian fight week chhungin UFC chuan venhimna lam pawh an uluk lehzual hle.
An insual zawh hnua thu thar thehdarhtute nena an inkawmnaah UFC CEO Dana White chuan Chimaev-a’n light heavyweight-a insawn a duh thu a hrilh tih a sawi chhuak a. Mahse, chumi zan la la chuan Chimaev chuan, “Kan inhmu leh thuai dawn nia,” tiin a X-ah a tar lang a, a team-te pawhin weight class thlak hmaa middleweight-a innuai nawn leh nghal a tum hmasak phawt tur thu an nemnghet bawk.
UFC emaw, Strickland-a emaw hian a hma thei ang bera innuai nawn leh nghal hi an duh dawn em tih erawh a hriat loh va. White-a chuan Chimaev-a weight sang zawk lama a insawn theihna tur chu thil phurawm tak a nih thu a sawi a. Strickland erawh chuan a kawnghren kawl lai humhimna hmasa berah French contender Nassourdine Imavov nen an inhmachhawn a rinawm thu a sawi ve thung.
An inhmachhawn hma boruak chu mawi lo hle mah se fight zawh hnuah chuan infiammi dik tak zia (sportsmanship) lantirin Chimaev-a’n kawnghren chu Strickland a hrentir a ni.
Strickland-a pawhin an inhnialna leh innghirnghona chu a tawp tawh thu a sawi bawk.