Aizawl: Mizo zinga khawvela tlang sang ber Mt. Everest lawnchhuak hmasa ber David Zohmangaiha chuan Thawhtanni khan a tlang lawn champha vawi 13-na pualin Civil Hospital, Aizawl-ah thisen a pe.
Mt. Everest chhip a thlen hriatrengnan leh a mamawhte’n a hman atan kum 2014 atang khan David Zohmangaiha hian thisen kumtin ala pe a, Covid avangin kum khat awlin, tum 12 a pekna chiah a ni, thisen hi tum 28 a pekna a ni bawk.
David Zohmangaiha hian kum 2013, May 18 khan khawvela tlang sang ber hi Mizo zinga a hmasaber ni turin a lawn chhuak a, hemi kum hian India hmarchhak bil, Northeast India Mt. Everest Expedition team-ah a tel a, ama rual hian India hmarchhak mi 12 zetin Everest chhip an thleng a ni.
Everest a lawn hnuah sorkar hna te thawkin politics lamah a lut a, AMC term liamtaah khan corporator atan thlantlin a ni a, a bial hi hmeichhe reserve seat a nih tak avangin a chuh zui ta lo a ni.
Mizo zingah Everest lawnchhuak hi pathum an awm tawh a, Davida dawtah hian Lalrintluangi chuan NCC expedition team a telin May 21, 2016 khan a lawn ve leh a, May 19, 2019 khan NSG team member Johny Laltlanmawia chuan Everest a lawn ve leh a ni.