Aizawl: India ram pumah a tahtawlin Special Intensive Revision (SIR) of Electoral Rolls neih mek niin Mizoramah pawh kalpui tan a ni a. SIR-ah hian mipui leh ECI beiseina tihlawhtling turin tan an lak a ngai tih Chief Electoral Officer (CEO) Dr. Lalrozama chuan Thawhtannia SP Conference Hall-a SIR chungchang training hawnnaah a sawi.
Mizoram puma Election Officer (EO), Electoral Registration Officer (ERO), Assistant Electoral Registration Officer (AERO) leh District Level Master Trainer (DLMT) te tana buatsaih, ni khat awh training hawnnaah hian CEO chuan e-roll an khawih dawn avangin fimkhur hle a tul thu a sawi a. Mizoram khua leh tui dik takten vote an neih theihna turin tihsual leh hmaih nei hauh lova uluk leh fimkhur taka hna thawk turin hna thawktute hi a fuih.
Dr. Lalrozama chuan Block Level Officer (BLO)-te chu an kutke ber tur an nih avangin hmang thiam turin kalkhawmte a chah a. Langtlang leh rintlak taka e-roll buatsaih tura political party-te pawimawhzia sawiin, political party-te ruat Block Level Agent (BLA)-te pawh tangkai taka hmang turin a sawm bawk.
Election Commission of India (ECI) hian May 14, 2026 khan SIR neih tur thu a puan avangin chak takin hmalak nghal a ni a. Thawhtanni nileng khan Mizoram chhunga district zawng zawnga EO, ERO, AERO leh DLMT te tan hian training hi buatsaih chhunzawm nghal a ni.
He training programme hi Joint CEO Ethel Rothangpuii chuan a kaihruai a, F. Lalnisai leh Timothy R. Lalhmangaiha ten kal khawmte hi zirtirna a pe a ni.