Aizawl: Home Minister K Sapdanga hovin Mizoram sorkar leh HPC-D(LF) te inremna thuthlung (Memorandum of Settlement)-in a ken tel, Charter of Demands-a tarlan point hrang hrangte tihhlawhtlin dan tur leh a bawhzui dan tur relin Home Department Official te nimin khan an thukhawm.
Charter of Demands-ah hian Lalhmingthanga Sanate hova HPC-D Cadre inpe tate intundinna tur mai ni lo, Hmar tlang dung huap hmasawnna tur rawtna tha tak tak a tel a. Inkalpawhna tha siam te, mipui mamawh tak tak – zirna in tha leh sorkar office din belh te leh lo neia eizawngte tana chhenfakawm, Agro-based industries din leh a dangte a tel a ni.
Thutkhawmah hian HPC-D(LF) te mamawh leh ngenna hrang hrangte chu uluk taka thlir nawnin, department hrang hrang kaihhnawih thil a nih hlawm avangin, a changtu department theuhvah hma lak thuai a nih theih nan lehkhaa thlen ni se, an ti a. A theih ang anga bawhzuiin hmalakna report pawh dil khawma thlirho leh thuai ni se an ti bawk.
Thutkhawmah hian Adviser to CM (Pol) Lalmuanpuia Punte, Home Secretary leh Home Department Officerte bakah, Sr. SP, CID(SB) te an tel bawk.