Aizawl: Home Minister K. Sapdanga leh Excise & Narcotics Minister Lalnghinglova Hmar te kaihhruaiin Mizorama ruihhlo do beihpui thlak dan thlirletna chu nimin khan home minister pisaah neih a ni.
Thutkhawmah hian home, excise & narcotics, food & drugs administration (FDA), Central YMA hruaitu, Aizawl DC leh SP te an tel a. September, 2025 atanga ruihhlo do beihpui thlakna, ‘Operation Jericho’ hlawhtlinna thlirletin tha thlah lova hmalak chhunzawm zel nise an ti.
Tar lan a nih danin tun laiin Mizoramah heroin, ganja leh ruihhlo dangte a hluar a. A bik takin Aizawlah ‘café culture’ uar thar a nih avangin thalaite zingah ruihtheih a hluar phah hle nia hriat a ni a. A bikin tun hnaiah khuh damdawite chu dan ang thlapin Dak In (Post Office) kaltlangin Mizoramah a lut hnem hle tih tar lan a ni a, hemi chungchanga hmalak dan tur hi an sawiho.
Sorkar chuan ruihhlo do kawnga hma latu police, excise leh CYMA hnuaia Central Anti-Drug Squad (CADS) te hmalakna chu thawhpui zel a. Sorkar hnathawkte leh tlawmngai pawlte tha tichak zui zel turin hma lak chhunzawm an rel bawk.