Aizawl: Saitual district chhung, Keifang Junction-ah Mizoram Police chuan Thawhtanni tlai dar 5:45 vel khan Manipur atanga Aizawl pan lirthei pakhat an endik atangin methamphetamine nia hriat, tual chhung rate-a Rs 19,21,28,000 man hu lai hmuchhuakin an man.
Mizoram Police chuan ruihhlo phur tura an rinhlelh, Nexon Car (a var), Registration No. ML-05-V-3282 chu Keifang junction-ah hian lo tidingin, uluk taka an dap hnuah motor hnung lam, spare tyre dahna hnuai leh mud guard sir tawn ve veah polythene duma tuamin ruihhlo tam tham tak, methamphetamine (Meth) nia hria bawm 20, mum 202,000, a rih zawng Kg 24.016, tualchhung rate-a chhuta Rs 19,21,28,000 man hu an hmuchhuak a ni.
Heng ruihhlo te hi Th Onkhothang Haokip (33) s/o Th Ngamkholet Haokip, Moreh, Tehsil, Moreh, District Chandel, Manipur leh Mathew (46) s/o Ngamkhojang, Jolzam, Churachandpur, Manipur nia inchhalte kut atanga man a ni.
Heng mi pahnihte bakah hian ruihhlo leh an phurhna lirthei hi man nghal a ni. He thilah hian NDPS Act, 1985 tlawhchhanin section 22 (c)/25/29 hnuaiah thubuai (case) ziah luh a ni a, chhui zui mek a ni.