Aizawl: Adviser to Chief Minister (Handholding) Dr KC Lalmalsawmzauva chuan sawhthing market chu research base a kalpui a nih avangin tum mumal tak leh year wise target neia hmalak mek a nih thu a sawi.
Thawhlehni khan Tuirial SCC, Tuirial Airfield-ah Sawhthing Flag Off Programme neih a ni a. He huna khuallian, Dr. KC Lalmalsawmzauva, Adviser to CM (Handholding) chuan Tuirial SCC atanga sawhthing batch hnuhnung ber tur a vai liam a. He SCC atanga kumin atana batch hnuhnung ber tur vai liam a ni thei leh a rate thu-ah pawh Rs.51 a tihral theih a ni tur chu lawmawm a tih thu a sawi.
Dr. KC Lalmalsawmzauva chuan SCC, PCC, DAMC leh MAMB lama a thawhpui te, CEO (Handholding), Aizawl East huam chhunga party hruaitute leh media-te hmaah lawmthu a sawi a. Sorkar official-te rinawmna leh kut hnathawktute hmangaihna avanga hetiang thil hlawhtling a thleng thei hi lawmawm a tih thu sawiin, “Sawhthing market chu research-base a kalpui a nih avangin tum mumal tak leh year-wise target neiin hma lak mek a ni,” a ti.
Adviser to CM chuan Mizoram sawhthingin hma a sawn rualin ram chhung leh pawnah hriat an hlawh tawh hle tih sawiin, Niti Aayog pawhin Mizoram chu ‘Ginger Capital of India’-ah a puang hial a ni tih a sawi a. Sawhthingte chu Cachar leh Siliguri chauh ni lo, Mumbai, Delhi, Punjab, Kolkata, Odisha, Andhra Pradesh leh foreign ram thlengin thawn chhuah a ni tawh tih a sawi bawk.
Dr. KC Lalmalsawmzauva chuan phai khaw lum lama sawhthing thar a zawh chhoh thin avangin April thla chawhnu lam hi sawhthing demand awm tak tak hun a nih thu a sawi a. Kumina harsatna ber chu a rate awm har lutuk leh sorkarin an la har deuh anga a lan bakah, a tir lama rate tuk sang lutuk avanga farmer-te calendar a buai deuh hlek kha a nih thu sawiin, demand awm laia supply thei tura inbuatsaih a ngaih thu a sawi.