Kum 2011 a chhiah awlruk thubuai avanga a chungchang ngaihtuah Shakira chu thiamchantir a ni a, Court chuan Spain sorkar chu US dollar maktaduai 65 vel pe let turin a hriattir bawk.
Spain High Court chuan hun rei tak chhung he thubuai hi ngaihtuahin, kartir khan court chuan thutlukna a siam a, thubuaiah hian zaithiam chu thiam a chantir ta a ni.
Zaithiam, kum 49 mi hi Spain-ah chhiah a awlru nia sawiin, kumriat chhung vel zet a thubuai hi ngaihtuah a ni a. Kum 2011 khan Spain-ah chhiah a awl rua puh niin, hei hi kum rei fe ngaihtuah a ni a, hemi kum hian ni 183 chhung an awm tling lo a nih chuan chhiah chawi a ngai loh avangin a insawifiahna hrang hrangte court chuan a ngaihthlaksak hnuah Shakira chu ni 183 a awm tling lo ngei tih finfiah a ni a, ni 163 chhung chauh awmin, hun rei tak chhunga a thubuai neih chu chinfelin a awm thei ta bawk a ni.
Report thenkhat chuan Shakira hi thiam loh chantir ngawr ngawr tuma beih a ni an ti ve thung a, a pasal hlui Gerard Pique tantute leh ngaisangtuten a chhiatna lai an zawn ve char char reng avangin thubuai pawh hi ngaihtuah hun chhung a rei niin an sawi.
Spain footballer hlui Gerard Pique leh Shakira te hi hun engemawti chen an inneih hnuah hmingchhe takin an inthen a, fapa pahnih Milan,13 lh Sasha,11 te nei hmanin, an nu bulah an khawsa zui a ni.
A thubuaia thiam a chan hnu hian Shakira chuan a lawmthu sawiin, vawiina ka hlimna hi a sang hle, court hmangin ka dikzia hailan a ni a, thil tisual duh mi ka ni ngai lo, khawiah pawh khua leh tui tha nih duh mi ka ni reng, he hnehna hi ka tan leh min duhsaktu zawng zawngte tan a ni e, tiin a sawi.