A umtu zawk ni chungin Tuichangralin tha takin an bei let a, Thawhlehni zan Mizoram Rural Bank Pro Volleyball League-ah champion lai, Anastasia Electric Veng nen set nga an inkhel hnuah, an mamawh rilru lama fiahna pawimawh tak paltlangin hnehna an sual chhuak.
Sri Lanka atanga an lak luh, Mahela Indeewar chuan khawchhak team tan a theihna nasa leh zualin a lantir a, vawi 40 vaw tlain point 13 paih tel mah se mi malin a filawr a. An khelh hnuhnun vawi hnihah Tuichangral an chak zawn a, Swiss League-a khel thin hian hnehna kawngah team hruaiin Kuriz Player of the Match lawmman a dawng zawn.
Chiang taka set hmasa ber an hloh hnuah Tuichangral an insiam tha a, hmasawn zawka an khelh theihna chhan pawimawh, Lalrinpuia’n Anastasia ball vuak dangin taima takin a zuang a, team thar hlak ang maiin set hnihna atangin an inlan a. Rinpuia’n point 13 hlawh chhuakin tum li chiah a tisual a, Saidingpuia Sailo chuan tum 11 hlap tlain point riat a hloh bawk.
Set thum faia Thutak Nunpuitu Team an hneh hnuah Tuichangralin set nga inkhel turin rilru leh taksa lamah an inpeih tih an lantir a, league bul an tannaah Khawbel nen set nga an inkhelh hnuah a chak lo zawkah an tang tawh a. Anastasia hmaah set hnih an hloh avangin point thum erawh an hmu zo lo va, point hnih neih belhin khelh thumah point ruk hmuin 3-naah an insawn chho.
Electric Veng club an nghet tawk lo va, an hneh tawh, TNT leh Khawbel lakah set hloh tel ve vein Tuichangral lakah vawi hnih set la hmasa zawk ni chungin an tlawm a. Chutih rualin a chak lo zawk ni mah se set hnih an lak avangin point khat an neih belh a, khelh thumah point sarih hmuin a chung berah an kir leh a, anni aia vawi khata khel tlem, Hunthar leh an hneh loh, Tuichangral aiin point khatin an sang.
Anastasia tan an khelh hmasak vawi hnih aiin Khawhai tlangval, Zomuansanga a che tha ve thung a, tum 25 hlap tlain point sarih a paih a, Karthik Madhu chuan vawi kua tisualin point 19 a hmu a. Zosangzuala (Mama) chuan point 14 hmuin point li a paih a, set khatnaah Laldinsanga’n mittlung takin khel mah se set hnihna atangin chet a harsat a, vawi riat a vuak tlak laiin point nga a hloh.
India captain hlui, Karthik an lak luh atangin Pro Volleyball League-ah khelh ruk an chak zawn hman a, a tum khat nan an tlawm ta a. Nikumah league khelh hnih an la nei tihin Anastasia-in Tamil Nadu player an chhawr tan a, Tuichangral an hneh hnuah vawi thum chak zawnin an champion a. Nomawi humhim turin tun tumah bul an tan tha a, vawi hnih an chak zawn laiin Tuichangral erawh an khelh hmasak berah Khawbel an hneh lo nghal.
- MIZORAM RURAL BANK PRO VOLLEYBALL LEAGUE 2026
May 11 – June 13, 2026 @ LPS Arena, Falkland, Aizawl
RESULT (Round 3) : May 19, 2026 : Thawhlehni Zan
Tuichangral def Anastasia Electric Veng (mipa) – 17-25, 25-19, 21-25, 25-21, 15-12 (3-2)
Kuriz Player of the Match – Mahela Indeewar (Tuichangral)
Cheetak Fan of the Night – Jerry MS Hmar (Khawhai)
MVA Lucky Fan – Mary Lalruatkimi (Tuichangral) & Lalnunmawia (Electric Veng)