Aizawl: Forest minister chuan Zofate then hrangtu international border hi sut thiah a la ngai dawn tih a sawi.
Zo Re-unification Organisation (ZORO) dincham vawi 38-na chu MZP Conference Hall, Treasury Square-ah nimin khan lawm a ni. He hunah hian Forest Minister Lalthansanga chu khuallian niin, Adviser to CM Lalmuanpuia Punte leh Prof. J. Doungel te chu Resource Person an ni.
ZORO President R. Sangkawia kaihhruai inkhawmah hian khuallian chuan ZORO a lo din tirha ke ngata Champhai an lo kal ve tawh thu sawiin, khawvel hmun hranga Zohnahthlak nuaih 35 vel awmte international border-in a thenhrang hi sut thiah a la ngai dawn tih a sawi.
Minister chuan khawchhak lam atanga lo kalte zinga thil tha lo tel thinte avanga central home ministry-in ramri hung tura nawrna nasa tak a pek thu sawiin, unau inkara pal inhung hrang awm lo se a duh em em laiin hmabak duhawm lo a thlen loh nan unau hmun hrana chengte pawh an khawsak dan leh eizawnna kawnga fimkhur turin a chah a, hnamdang lakah pawh mahni Mizo nihna chhuang a, mahni tang ngaihlu tlat turin a chah.
“Kan Mizo nihna hi chhuang takin awm ila, hnamdang tawng aiin kan tawng hi hnamdang lakah pawh kan rawlh zel zawk tur a ni a, kan rama lo zin te pawhin ka tawng an lo zir theih zawk nan kan tawng hi ngaihlu zel ang u,” tiin forest minister chuan a sawi.
Inkhawmah hian Adviser to Chief Minister Lalmuanpuia Punte chuan ‘Zofate Dinchhuahna’ tih thupui a sawi a, Prof. J. Doungel pawhin ‘Ramri Hung’ tih thupui hmangin zirtirna a pe bawk.