Aizawl: Mipui tana healthcare service leh sorkar hnathawh tihchak zualna tur, Online Medical Referral System chu Health Minister Lalrinpuii’n Nilaini khan a tlangzarh.
SAD Conference Hall, MINECO-a tlangzarh inkhawmah Minister Lalrinpuii chuan, department hna thawktute chu Online Medical Referral System vil ngun tur leh, a nihna tur taka hman a nih theih nan an hnathawhnaah tih takzet leh tha thlah loa an thawh a ngaih thu a sawi a. Emergency refer atan a tangkai tur thu leh a viltuten an vil hneh a ngaih thu a sawi.
Health & Family Department hnuaiah hmalakna thar tam tak a awm a, hengte hi hmang tangkai tur chuan Health Department hnuaia Officer-te theihtawp an chhuah a, district tina CMO ten tan an lak a, an hnathawh an pho lan thiam a tul thu a sawi bawk.
Online Referral Portal hi sorkar hnathawk-te tana siam a ni a, an department thawhna atanga forwarding letter leh board lehkha nen upload mai tur a ni a. Provisional permission nen hian, Mizoram State Health Care Society (MSHCS)-ah in-report leh tur a ni.
Sorkar hnathawk ni lo (MUHCS beneficiaries – General)-te chu MUHCS-ah medical board lehkha nen in-report tur a ni thung.
Final permission hi document en fel a ngaih avangin, DHME-ah damlo emaw an chhungte emaw office hun chhunga kalin lak chhuah theih a ni ang.