Aizawl: Chief Minister Lalduhoma kaihhruaiin Nilaini khan Chief Minister’s Charitable Trust Board of Trustees chuan CM Office-ah annual meeting an nei a, he hunah hian trust chu department, society, NGOs leh mi mal pawhin Corporate Social Responsibility (CSR) dawnthleng atana an hman theih tura inhawn an remti.
Thutkhawmah kum kalta chhunga an sum dinhmun thlir letin, Financial Year 2025-26 atana trust auditor leh Pro Bono Advisor tur an ruat bakah, Board Chief Executive Officer atan R. Lalrodingi leh Secretary atan Raymond Lalmuana te an ruat thar a; ram pawn atanga dan ang taka tanpuina (donation) dawn theihna Foreign Contribution Regulation Act (FCRA) registration neih tha tiin hmalak zui an rel a, Mizoram CSR Cell nena thawh dun theihna awm apianga thawh dun pawh an remti bawk.
Trust inhawn thar tak avang hian Mizoram sorkara department hrang hrang, society, NGO leh mi malten CSR dil chhuah an neih changa implementing agency an mamawhin Chief Minister’s Charitable Trust hi agency-ah an hmang thei tawh dawn a ni.
Chief Minister’s Charitable Trust-ah hian Chief Minister Lalduhoma chu settlor a ni a, Vanlaldina Fanai, Secretary to CM leh David Lalthantluanga, Secretary, P&PI te chu ex-officio Trustee an ni.