Mizoram sorkarin sum leh pai leh tuialhthei renchemna tur ruahmanna thar a siam a. Ruahmanna thar a siamah chawlhkar khatah Nilaini apiangin sorkar lirthei an tlan dawn lo va. Department tina thawktu zaa 20-in in atangin hna an thawk dawn a. He ruahmanna hi May 21, 2026 atanga hman tan tur a ni.
General Administration Department-in Thawhlehnia Office Memorandum a tihchhuaha a lan danin, Asia khawthlang buaina vanga prime minister ngenna angin sum leh pai leh tuialhthei inrenchemna tura ruahmanna siam a ni a. Chumi ang chuan department tina hnathawktu zinga za zela 20-te chuan in atangin hna an thawk ang a. In atanga hna thawh dan tur chu department head-ten an ruahman ang a. Hei hian damdawi leh chhiatrupna thil te, tui sem, power supply, transport services, dan leh hrai kengkawhtu te a huam lo ang.
Pisa tan hun thlak danglam a ni a, department hrang hrangte chu zing dar 8:30 atanga tlai dar 4:30 thleng pisa kai tur leh zing dar 10:30 atanga tlai dar 6:30 thleng pisa kai tur thliar hran an ni.
Nilaini apiang chu No Official Vehicle Day a ni ang a, officer-te leh hnathawktute chu he mi ni hian kea kal tur leh public transport hmang uar tura ngen an ni.
Chief minister, minister-te leh Mizoram sorkar hotu dangte chu an duh dan anga anmahni zui thin lirthei zat titlem tura tih te a tel a ni.
Hei bakah hian pisa bân hnuah light, fan leh electric hmang hmanraw dangte off vek tur te, loh theih loh a nih loh chuan air conditioner (AC) hman loh te, a theih anga êng pangngai hman tur tih te, ram puma thil pawimawh bik (national event) thil a nih loh chuan sorkar in hrang hrang êng hmanga chei loh tur tih te a tel bawk.
GAD-in Thawhlehni veka addendum a tihchhuahah he sorkar ruahmanna thar hi vawiin atanga kalpui tura tih a ni.