Mizo hnam kan lo changkan a, khawvel hmasawnna kan lo pawh ve takna kawngah hian Serkawn hming hi hmaih rual a ni lo. April ni 29, 1903 khan Baptist Pioneer Missionary pahnih, Pu Buanga (James Herbert Lorrain) leh Sap Upa (Frederick William Savidge) te chuan Lunglei Inspection Bungalow chhuahsanin, tuna Serkawn tia kan hriattakah hian an insawn a. Chu ni chu Serkawn pian ni a lo ni ta a ni. Vawiin hian Serkawn chuan kum 123 hmel a lo hmu ta reng mai. Kum 2028-ah Kum 125-na quasquicentennial Jubilee an thleng dawn a. Lawm ngei se a thain ka hria.
Baptist Missionary Society (BMS) report hrang hrang leh Missionary-te thuziak kan thlir hian, Serkawn hi khawvel hmun dang nena min thlunzawmtu a lo ni reng thin a. Missionary-te khan Serkawn kha hriselna leh inrelbawlna atana hmun strategic (pawimawh) tak a nih avangin an thlang a ni.
BMS Report 1920-30 vela kan hmuh chuan, Serkawn hi “Mizo zirlai thiam thei ber berte fuankhawmna” tia tarlan a ni hial a. Pu Buanga leh Sap Upa te khan Serkawn atang hian Mizo Dictionary leh Grammar tih hmasawnna hna-te, Bible lehlin hna te an thawk a, chu chuan Serkawn chu Mizo tawng leh literature vawnthatna hmunpui (Literary Center) a nihtir a ni.
Serkawn pian hnu reilotê, July 1903-ah Serkawn Sikul din a ni a. He sikul hian hruaitu rintlak tam tak a chher chhuak a ni. Amaherawhchu, Serkawn hming ti lartu ber pakhat chu “Serkawn Concert” kha a ni. 1932-ah khan Serkawn Middle School-ah hian Concert hmasa ber neih a ni a, 1946 thleng khan neih chhunzawm a ni.
Hemi atan hian Rev. H.W. Carter, Zirtirtu Lalmama, Selṭhuama (Lena), Liandala, Chhuana, Hotu Rokunga leh mi dangte an pawimawh em em a ni. Pu Carter-a hruaina hnuaiah, zirtirtu thiam tak takte chuan lemchan (Drama) an ziak a, hla mawi tak tak an phuah a, chu chuan Mizo thu leh hla khawvelah hmasawnna nasa tak a thlen a ni. An Concert-ah hian Shakespeare-a drama-te hial an chang thin.
Rev. H.W. Carter-a khan Serkawn chu *”A place where talent meets dedication” tiin a lo sawi tawh a. Missionary-te report-ah pawh “Veng thianghlim leh discipline tha ” tia tar lan a ni thin. Lunglei SDPO ka nih lai khan Serkawn mi pakhat chiah man a ni.
Serkawn kum 123-na hian —Serkawn hi veng satliah a ni lo a, Mizoram tana hmasawnna hruaitu a ni a ni. Pu Buanga leh Sap Upa te lungphu phum atanga in tanin, Pu Lalmama te ang mi thiamten an lo chhunzawm a. Rinna, thiamna, leh discipline dik tak nena kan kal chuan kan hnam hian hma a sawn zel dawn a ni tih Serkawn hian min zirtir reng a, tuna Serkawn pawh hian chhunzawm zel se ka ti hle mai. Kum 2 lo awm tura an kum 125-na hi ropui takin lawm se tiin ka khar ang e.