Aizawl: Mizoram Movement for Old Pension Scheme (MIMOPS) chuan Nilainia office bearer leh adviser thukhawm chuan an thil dil chungchanga sorkar lakah hmasawnna hriat tur a awm loh avangin sorkar auh eih nan June 8, 2026 hian Mizoram sorkar hnuaia NPS subscriber zawng zawng ten ‘Mass Casual Leave’ la vek turin thutlukna an siam.
MIMOPS chuan kum 2023-a sorkarin a din sak NPS Study Committee-in nikum March thla khan an report theh lut tawh mah se, sorkar thuneitute hian tun thlenga hmalakna mumal an la chhawp chhuak lo hi pawi an tih thu an sawi a. An duh ber Old Pension Scheme (OPS) ni lo mah se, OPS hlawkna tam zawk (80% vel) awmna study committee report chu an pawm mai thu sorkarah thlen tawh mah se file a bo zui thin avangin beidawnthlak an tih thu an sawi.
Nikum October thlaa Vana Pa Hall kawta Peaceful Rally an neih hnuah pawh chief minister hmuh an dilna chu tun thlenga chhanna an la hmuh loh bakah e-file hmanga sorkar pui tura an hmalakna thar pawh tun thlengin finance commissioner-in a la tichhuak lo tih an sawi.
MIMOPS chuan state dang ten central sorkar thutlukna tlawhchhana Unified Pension Scheme (UPS) thlengin mipuite an offer tawh lai a, Mizoram sorkarin engmah a la hlan ve duh lo chu lungawithlak an tih loh thu an sawi.
Hetiang hi an dinhmun leh thil tawn mek anih avangin finance chhawpchhuah tur hi an duh dan thlap ani emaw, ni lo emaw, sorkara nawr zui zel theih tura chhawpchhuah anih vat hi a pawimawh hmasa an tih avangin beiseina nen Mass Casual Leave lak hi an tel ta tih an sawi.