Aizawl: Social Welfare Minister Lalrinpuii chuan ram chhung leh tual chhung inrelbawlnaah hmeichhiate hmun pawimawh tak luah tura hmalak mek a nih thu a sawi.
Rural Development & Administration Department (RD&AD) buatsaihin Ningani khan Mizorama a vawi khatna atan Vana pa Hall-ah village council hmeichhe pualin ‘State Level Convention for Women Elected Representative of Village Councils’ hman a ni a. He hunah hian Social Welfare Minister Lalrinpuii chu khuallian niin, RD&AD Minister Prof. Lalnilawma chu khualzahawm niin a hmanpui.
Khuallian chuan ram chhung leh tualchhung inrelbawlnaah hmeichhiate hmun pawimawh tak luah tura hmalak mek a nih thu sawiin, Parliament thleng pawha 33% reservation pass a ni ta chu Mizo hmeichhe hruaitu tam tak lo chhuak mekte tan hmasawnna kawng pawimawh tak a nih thu a sawi a. VC hmeichhe hruaitute chu mahni inringtawk leh lu zo taka an nihna hlen chhuak ngei tur leh, mipuite tana rinawmna nena tualchhung sorkar hmalaknaa sulsutu ni turin a fuih.
Khualzahawm Prof. Lalnilawma pawhin hmeichhiate pawimawhna leh thawhhona kawnga an tangkai zia sawiin, VC hmeichhete chu an fund dawnte khawtlang hmasawnna atana dik taka hmang turin a chah a, thil tul hrang hrangah department-in a puih reng dawn thu a sawi bawk.
Khawmpuiah hian Aizawl South III bialtu MLA Baryl Vanneihsangi leh West Tuipui bialtu MLA Prova Chakma te chu khualthate niin, thu an sawi bawk.
District pakuaa VC dinhmun tlangpui :
Total seats – 2,414
General seats – 1,799
Reserved seats – 615
Autonomous District Council (ADC) Area dinhmun:
CADC Area:
Total seats – 516
General seats – 428
Reserved seats – 88
LADC Area:
Total seats – 595
General seats – 496
Reserved seats – 99
MADC Area:
Total seats – 591
General Seats – 492
Reserved Seats – 99