Home Minister K. Sapdanga’n tun hnaiah police leh home guard te sorkarin lak thar a tum a, infiammi, thahrui ngah leh discipline thaten mit an la hle dawn tih a sawi.
UD&PA minister ni bawk, K Sapdanga hian Nilaini khan Aizawl Smart City Limited hnuaia Rs vbc 10.65 senga sak, Hlimen Football Playground thar a hawng.
Hawnna inkhawmah tun hnaiah sorkarin police leh home guard lak thar a tum thu a sawi a, he hna laknaah hian infiam mi, thahrui ngah leh discipline tha tak takte chuan mit an la bik hle dawn tih a sawi.
Hlimen khelmual thar chu Aizawla football ground puitling tlemte zinga pakhat a nih thu leh veng field hrang hrang zingah chuan zana inkhelh theihna hmasa ber a nih thu sawiin minister chuan, hmasawnna chhinchhiah tlak tak a nih thu a sawi.
Khelmual thar chu field nuam satliah a nih loh thu sawiin thalai tam tak football lama mi chhuanawm chher chhuaktu, hriselna leh mahni invawnna kawnga Hlimen khawtlang tana malsawmna thlentu a nih a beisei thu a sawi.
UD&PA minister chuan sorkar hmasaten hetiang zawnga ngaihtuahna hmanga bul lo tantu an lo ni chu fakin tunah sorkar tharah infiamna lam tuipui tlattu sports minister an nei leh zel chu Mizo thalaite vanneihna a nih thu a sawi bawk.
Hlimen Football Playground hi April 25, 2022 khan sa hna bul tan niin, February 28, 2026-ah sak zawh a ni.
MNF-in khelmual hawn lawmawm ti
Hlimen Football Playground hawn a ni ta chu MNF chuan lawmawm an tih thu sawiin, “Hei hi sorkar hmasa (MNF ministry) hnuaia harsatna tam tak karah pawh playground tha, a hmun mipuiten an neih ngei theih nana theihtawp an lo chhuah luihna zar liau liau a ni,” an ti.
Ningania an thuchhuahah MNF chuan khelmual thar hi Aizawl Smart City hnuaiah Rs vbc 6.81 senga sak tur anga bul tan a nih thu leh, December, 2021-a agreement siam a nih hnuah kum 2022 khan hnathawh bul tan a nih thu an sawi a. MNF ministry laiin Dy. Chief Minister Tawnluia’n March 23, 2023 khan a lungphum a phum tih an tar lang.
MNF chuan he project hi a pum puiin Rs 10,65,23,890 (central sorkar hnuaia Smart City Mission atangin Rs vbc 9.58 leh state sorkar atangin Rs vbc 1.06) sen a ni a. Hetih laia bialtu MLA, Prof. F. Lalnunmawia, Hlimen Games & Sports Association, khawtlang hruaitute leh UD&PA minister hlui, Tawnluia hmalakna leh tumruhna zarah vawiina puitlin a lo ni ta chu khawtlang leh thalai infiammite tana rotling tur a nih avangin lawmawm an tih thu an sawi.
MNF chuan an ministry huna thalaite tana hmalaknate chu chhuanawm an tih thu sawiin, Rs vbc 22.3 senga siam, Durtlang Football Stadium pawh March 17, 2026-ah hawn a lo nih tawh thu an sawi a. Hawn hmabak, Zarkawt High School Field Playground leh thawh mek, Zemabawk Playground pawh a la awm nual tih an tar lang.
Heng stadium leh playground-te hi ram mipuite leh thalaiten an chhawr tangkai hun an nghahhlelh thu sawiin, MNF chuan tun sorkar lai (ZPM) chu project kal lai mekte tha taka an thawh zawh thuai theih nan theihtawp chhuaha hma la chhunzawm zel turin an chah nghal bawk.