Aizawl: Ram chhung hmun hrang hranga petrol, diesel, leh LPG (gas) mamawhna a pun thut avangin, sorkar hnuaia Oil Marketing Company (OMC) lian pathum — IndianOil, BPCL, leh HPCL te chuan petrol leh diesel hnianghnar taka a awm reng theih nan chhun leh zan zawmin hma an la mek.
Tun hnaiah state hrang hranga lo thlai seng hun (seasonal agricultural activity) a nih miau avangin oil mamawhna hi a sang chho hle a. Chu mai bakah, private oil hralhtute aiin sorkar oil outlet-ah te hian a man a tlawm zawk miau avangin, mi mal lirthei khaltute leh sumdawng lian tam tak sorkar oil (retail outlets) lamah an insuan luh hnem phah hle a ni. He thil thleng hian sorkar oil company-te lakah nawrna lian tak a siam a ni.
Mipui oil mamawh hnianghnar taka pek a nih reng theih nan, heng oil company-te hian an supply team, lirthei phur chi, leh oil depot hrang hrangte chu chhun leh zan zawmin an hna an thawhtir mek a. State sorkar hrang hrangte nen pawh an inbe reng bawk a ni.
Oil industry chuan mipuite chi-ai lo tura chahin, ram chhung hmun hrang hrangah petrol, diesel, leh gas khawl khawm (stock) a hnianghnar tawk a awm thu leh, harsatna a awm loh nan hmalakna zawng zawng kalpui a ni tih an sawi.
Oil company-te chuan an stock neih dan te ni tina endikin, sem zai dan tur (distribution planning) uluk takin an duang reng a ni.
Mipuite pawh chiai lo tur leh, hlauhthawn avanga mamawh bak oil thun khawm chiam (panic buying) ching lo turin an ngen a. Thu thang dik lo rinchhan lovin, sorkar leh oil company-te thuchhuah chauh ngaichang turin mipui an hriattir bawk.