Mizoram chhung inkalpawhna kawngpuite siamthat chhoh mek a ni a, hmun tam takah kawngpui a tha tawhin, zin veivah pawh a nuam tawh hle.
Hetih lai hian lirthei khalhtute kan fimkhur chhoh deuh deuh erawh a tul a, chetsualna hi a tam zawk chu fimkhur tawk loh vang a nih duh avangin fimkhur tura kan inchah nasat leh kan fimkhur zual a tul hle bawk.
Fur khua kan lut dawn a, fur ruahtui tlak lai hian chetsualna a awm duh bawk avangin a hma zawng aia kan fimkhur zual a va tul bawk em.
Tunhnaiah lirthei hmanga chetsualna hrang hrang kan hre chho leh mawlh mawlh mai a, heng chetsualna thleng thin tam zawk hi chu kan fimkhur tawk loh vang nia a lan thin avang hian kan harh thar a tul hle.
Kawngpui tha bawk, fur ruahtui tla bawk, fimkhur loh avanga chetsualna thlen duh bawk hun a nih chhoh avangin lirthei khalhtute kan fimkhur a tha hle a, khaw kar kawng a ni emaw, khawpui/khaw chhungah a ni emaw, kan lirthei khalh lai hi chuan nunna leh thihna kan kuta awm a ni tih kan hriat thar a va tha em.
Midang fimkhur loh avanga chetsualna tawk thei kan nih bawk avangin a hre zawk leh helama hmalatute hmalakna hrang hrang kan hriat thar a, nitin hian nunna leh thihna tawng thei reng kan nih avangin lirthei khalh leh chetvelna kawngah kan fimkhur thar a tul hle.