Royal Moroccan Football Federation President-in 2030 FIFA World Cup final an thleng dawn tia a sawi chu FIFA chuan chhang letin, chu mi chungchangah chuan thutlukna engmah siam a la nih loh thu an sawi.
Morocco hian Spain leh Portugal te nen kum World Cup 2030 hi an thleng ho dawn a. Kum 2010-a South Africa-in a lo thlen hnuah Africa khawmualpui ram zingah World Cup inkhel thleng thei ram pahnihna chiah an ni dawn a. Ningani khan FIFA chuan chanchinbu hrang hrangte hnenah final khelhna tur hmun hi a hun teah rel fel a la nih tur thu an hrilh.
Morocco soccer federation hotupa Fouzi Lekjaa chuan Ningania politics thila mipui punkhawmnaah an ramin final thleng tur hian chanvo an chang tawh tih thu a sawi niin tarlan a ni.
The Associated Press-in a tarlan danin Lekjaa chuan, “Benslimane khawpuiah World Cup final hi khelh a ni dawn a ni. In duh emaw, duh lo emaw pawh ni se, chumi chungchanga thu dang sawi duh an awm chuan, sawitir mai rawh u. A thlenna tur khawpui chu Benslimane a ni a, a khelhna tur chu Hassan II stadium a ni. Chutah chuan Morocco pawh an khelh ve ngei ka beisei,” a ti.
He stadium an sawi, a hming puma King Hassan II Stadium an tih hi Casablanca khawpui atanga hla lo teah sak mek a ni a, mi 1,15,000 lenna tur a ni.
Hemi hma hian British media-in FIFA President buaina ngah tak Gianni Infantino-a’n nakkum maia inthlan thar leh turah political lama thlawpna a dawn theih nan Morocco chu final thlen a lo tiam niin an tar lang a, chu thu thang erawh chu FIFA hian an lo pha tawh a ni.