Aizawl: All Mizoram Casual Teachers’ Association Executive Committee chuan a rang thei ang bera Casual Teacher Engagement Order (Inchhawrna order) tichhuak turin thuneitute an ngen.
Thawhtannia an thuchhuahah Mizoram Casual Teacher (Primary School, Middle School leh High School) Engagement Order hnuhnung ber chu March 2026 khan a tawp tawh a. Directorate of School Education chuan he order chhunzawmna tur hi kumin January thla tir khan DP&AR lamah thawn thla tawh mah se, tun thlengin a chhuak thei lo va. Order hi tichhuak rih lo mah se, casual teacher-te chuan thuawih takin census, training, zirtirna hna leh school mawhphurhna dangte thla hnih chhung dawn an lo thawk chhunzawm tawh tih an tar lang.
Casual teacher-te hi Mizoram kilkhawr ber ber thlenga dapchhuaka thawk an ni a, an zinga zaa 90 aia tam chu mahni in lum atanga hnathawk thei lo, hmun hla taka awm an ni. Engagement Order a chhuah theih tak loh avang hian thla hnih dawn hlawh hmu lovin an awm mek a, hmun hla taka thawk mek tam tak chu tunah hian chhuanchham dinhmun hialah an din mek avangin, a rang thei ang bera Engagement Order tih chhuahsak turin thuneitute an ngen a ni.