Aizawl: MNF Hnam Runa MNF chhung inkhawm leh Political Session Thawhtannia neihah, he huna thusawitu Ramthanmawia, MLA leh PAC member ni bawk chuan Mizoram sorkar chu mipuite harsatna tizuala oil mana ‘Cess’ a lak mek titawp turin an phut tih a sawi.
Ramthanmawia chuan Israel, Iran leh USA te boruak vangin khawvel huapah petrol leh diesel man a sang zel tih sawiin, tunah hian North East-ah Mizoram chu tuialhthei man sang ber a nih tak avangin mipui harsatna thlir hian sorkar chu a inngaihtuah nawn a tul tih sawiin, “Cess an lak hi ennawn a, titawp turin kan phut,” a ti.
MNF Party chu hnam martarte thisen leh Pathian kaihhruaina hnuaia din a nih thu sawiin Ramthanmawia chuan, midangten hnam rilru pu a hma an lakna chu tihkehchhiat tum viau mah se, a theih dawn loh thu leh Pathian bul tanpui ngei a nih angin hmalam an pan zel dawn thu a sawi.
Ramthanmawia chuan ZPM-ten opposition an nih laia dawt hmanga mipui an hruai sual dante sawiin, dawt chu a tlo ngai loh avangin nakkinah thalaiten thudik chauh an duh hun ala thlen dawn thu leh chumi hunah chuan diknaa kal zel tur MNF-ah an lo kir leh ngei tur thu a sawi bawk.