Aizawl: P&E Minister F Rodingliana chuan sorkar buidling 70 chuangah rooftop solar dah tum a nih thu a sawi.
Power & Electricity (P&E) Department buatsaihin Thawhlehni khan Mizoramah ni zung chakna (solar energy) hman tangkai zelna turin ‘PM Surya Ghar: Muft Bijli Yojana (Rooftop Solar Installation) inhriattirna leh ‘Celebration of Solar Month’ chu Secretariat Conference Hall-I, MINECO-ah hman a ni a. P&E Minister F. Rodingliana’n a hmanpui.
Khuallian F. Rodingliana chuan thu sawiin, “Kan ramin a mamawh ber chu mahni intodelhna tura hmalak hi a ni a, chumi kawnga kan mamawh pawimawh tak chu kawlphethaa kan intodelh hi a ni,” a ti a. India-ah tun dinhmunah Mizoram chu PM Surya Ghar-ah pakhatna a ni mek chu lawmawm a tih thu sawiin, leilung nghenga tharchhuah hrang hrang dahthat leh sawngbawlna lam leh industry lama hmasawn nan te kawlphetha a pawimawh hle a ni, a ti bawk.
P&E Minister chuan sorkar building 70 chuangah rooftop solar dah tum a nih thu leh, tun dinhmunah sorkar building 50 velah dah mek a nih thu a sawi a. “Kan ram thannan power hi kan mamawh a, kan ramin a tangkai taka kan hman theih chu rooftop solar energy hi a ni,” tiin chak taka hma lak zel a nih thu a sawi.
He hun kaihruaitu P&E Commissioner & Secretary, K. Lalrinzuali chuan, sorkar laipui Ministry of New and Renewable Energy-in May thla chu ‘Solar Month’-a a puan vanga he hun hi hmang an nih thu a sawi a. Mizoram chu boruak a thian avangin Solar Energy siamchhuah a remchang hle a, a hlawkpui tur chu mipuite an nih avangin kalkhawmte chu mipuia he hmalakna hi puangzar zual turin a chah a ni.