Aizawl: Health and Family Welfare Minister Lalrinpuii chuan Zoram Medical College & Hospital (ZMC&H)-a MBBS zirchhuak batch 3-nate puala Thawhlehnia buatsaih ‘Graduation Day’ a hmanpui a. He hunah hian Mizorama a hmasa ber tur, Rs vbc 8.18 man, Interventional CT Scan a hawng nghal bawk.
Academic Block-a inkhawmah health minister chuan graduate thar zirlai 96-te chu a lawmpui thu sawiin, doctor indaih lohna a phuhruk ngei a rin thu a sawi a. Zirlaite chu sorkar laka an bond (inremna) ziah ang taka kum hnih chhung Mizoram sorkar hnuaia thawk tur leh, zir zawm dawn pawhin ramin a mamawh tak subject-te thlang turin a chah.
Mizoram Health Systems Strengthening Project (MHSSP) hnuaia World Bank tanpuina hmanga lak, Interventional CT Scan (u-CT 780 Model, 128-Slice) hawn thar chungchang Project Director Dr. Lily Chhakchhuak-in a sawi fiah a. He khawl hi AI hmang niin cancer, lung lam tha lo leh naupang enkawl nan a tha bik a, Department of Radiodiagnosis hmunah bun a ni.
Graduate tharte hi Batch 3-na niin February, 2021 atangin zirna bul an tan a, zirlai 98 zinga 96 hi an pass a, pass percentage chu 97.95% a ni a. Pakhatna chu Alex Vanlalruatkima a ni a, zirna piah lama activities hrang hranga titha Paul Ngurthantluanga Vanchhawng hnenah Col VL Ruata Award hlan a ni.
He hunah hian Adviser to CM TBC Lalvenchhunga pawhin zirlaite tlawmngai taka thawk turin a fuih a, inkhawm hi Prof. Zoramthara Zadeng in kaihruaiin, Dean Prof. Swati M Patki-in zirlaite thutiam a neihpui a ni.