Hnehna kawngah Hunthar kir lehin Mizoram Rural Bank Pro Volleyball League nomawi chuhtu an nihzia an lantir thar leh a, Nilaini zana set thum set khata Tuichangral an hneh rualin zuamawm an ni lo tih an entir tel nghal.
An khelh hmasak vawi hnihah harsa lo takin Sihphir leh Khawbel an hneh zawn a, rin an hlawh lai takin a mawnga awm leh khelh thum tlawm zawn lai, Thutak Nunpuitu Team hmaah Inrinni khan Hunthar an che sual a, an nihna an hloh phah hle.
Mahse, an inlan leh hmasak berah Tuichangralin league kal meka vawi thum chak zawn hmasa ber nih an tumna dangin pahnihnaah an insawh nghet a, vawi li an khelh tawhah point 10 hmuin anni aia vawi khata khel tam, Anastasia Electric Veng aiin point khatin an hniam.
Hunthar tana ball vaw tlatu, Suryansh Tomar leh Fabian Lallunghnema tenn an elpui leh Tuichangral innghahna, Mahela Indeewar leh Saidingpuia Sailo an khum a, Uttar Pradesh spiker chuan point 32 hmuin 11 a hloh va. Khaw chhak team-in Sri Lanka atanga an lak luh, Mahela chuan vawi 29 a vuak tlak chanve point a hloh va. Kolasib chhuanvawr, Fabian-a’n tum 17 hlap tlain vawi nga a tisual a, Khawhai tlangval Saitea’n point 18 a hmuh zahve a paih ve thung.
Hunthar captain Remsangzuala (Lalmama) chuan team pahnih inkarah danglamna a thlen a, team khai khawmtu a nih piah lamah point khat hlohin point sarih a hlawh chhuak a, league kal mekah setter zinga Kuriz Player of the Match lawmman dawng hmasa ber a ni.
Tuichangralin Khawbel an hneh lo nghal a, a hnuah TNT leh champion lai, Anastasia hneh zawnin hma lam an pan a, team boruak tha tak hnuaiah kar khat chuang inbuatsaihna hun nei chungin Hunthar hmaah an inlan.
Set hmasa ber la thei tura 16-11-a hma an hruai hnuah an inpawh thlaktir bakah Anastasia an hneh tuma point 40 hmu thei, Mahela a khauh tawk lo va, a kutthlak a nat loh bakah team-in an mamawhna a san hun lai, set linaah a zuai leh zual.
A vawi khat nan champion thei tura Tuichangralin beiseina an neih tawh a tla hniam leh a, table-ah pathumna luah zui mah se vawi li an khelh tawhah Chhinga Veng Spikers nen point ruk ve ve hmuin set an lak zat a inang a, set hloh tlem zawk an nih vangin an sang zawk a. Zirtawpni zanah Chhinga Veng nen an intawng dawn a, team pahnih tan a pawimawh dawn hle a ni.
A vawi thum nan Hunthar an chak rualin an khelh tawhah point an la hmu vek a, Inrinni zanah Anastasia nen hmahruaitu nih inchuhin an intawng dawn.