Aizawl: Tourism director charge la tura sorkarin a ruat, R Lalrodingi chuan Ningani khan chief minister hnenah tourism director atanga banna a thehlut a. Chief minister pawhin a pawmsak a, hetiang a nih avang hian MZP chuan an kal zel dan tur ngaihtuah tura chawhnu dar 1 a thutkhawm an koh pawh an thulh ve nghal.
R. Lalrodingi hian chief minister hnena lehkha a thawnah, “Tourism hmasawnna kal mek a thuanawp lohna turin tourism department director post min chelhtir chungchangah MZP-in nasa taka an dodal tak si avangin, ni thum lai office hna kal thei lovin kan lo awm ta reng mai a. Hemi chungchangah hian hna tithuanawptu leh i sorkar pawhin duhsak uchuak nei anga lang thei tura keimah ka lo awm reng hi a dik theiin ka hre lo,” a ti a. “Chuvang chuan director, tourism hna atang hian min la sawn mai turin ka ngen che,” tiin, “Departmental officer post a nihna erawh chu humhim theih hram dan awm sela tih erawh chu ka ngen tel bawk a ni,” a ti.
R Lalrodingi chuan tourism department-ah a service hun tawp lama dah a nih avangin lawmthu a sawi tih a lehkhaah hian ziakin, dodalna nasa tak a awm avanga in-resign a nih thu a sawi bawk.
Hetih lai hian MZP chuan niminah sorkar chawlh a nih avangin tourism pisa kai tur an dan chhunzawm loh thu an sawi a, hmalak zel dan tur ngaituah tura chawhnu dar 1-a thutkhawm an ko va. Amaherawhchu, R. Lalrodingi a inhnuhdawh tak avang leh sorkarin a pawm avangin thutkhawm an thulh nghal thu an sawi.
MZP chuan hun lo la kal zel turah hetiang thil hi thleng nawn tawh lo se an duh thu an sawi a, pensioner rawih nawn (re- employment) emaw, service extension0in thalai tam tak hna zawng mekte a dal thin avangin hetiang kalphung hi tha an ti ngai dawn lo tih sawiin, an dodal zel dawn thu an sawi.