Aizawl: MNF Senior Vice President Dr R Lalthangliana’n tun hnaia Aizawl khawpui kawng siamna sum chu MNF dik leh huaisen rah a ni a, hmingthatna pawh zaa 70 an hauh ngam thu a sawi.
Dampa MNF West Block Leaders’ Meet Inrinnia Phuldungseia Phulbial Community Hall-a a hmanpuinaah Dampa bialtu MLA Dr. R. Lalthangliana chuan, AMC-ah kum 10 zet a zawnin MNF an sorkar tawh a, mipuiin ko thlak ve riha mi dang enchhin an duh a. Mizoram puma MNF dinhmun tilangtu a hman theih a ni lo tih sawiin, inenfiah leh inzirna atan tangkai takin an hmang mek a. Hetih lai hian Dampa bial leh Zoram hmun hrang hrangah MNF zawm thar Pathianin a pek belh zel tih a sawi.
Dr. R. Lalthangliana chuan, tun hnaia Aizawl khawpui kawng siamna sum kha MNF dik leh huaisen rah a ni a, contractor hnathawk tha lo Court-a MNF kaihhruai sorkarin a khin hnehna penalty sum tlingkhawm Rs vbc 90.60 hmanga siam a ni a. Aizawl khawpui kawng siam theihna chhan kha MNF-in Mizoram pawn thlenga huaisen taka court-a a din rah a ni tih sawiin, “Chuvangin, Aizawl khawpui kawng thawm that hnaah hian MNF-in ZPM aiin tha kan thawh hnem zawk a, hmingthatna pawh zaa 70 chu kan hauh ngam,” tia sawiin, MNF kaihhruai sorkar sum hlawhchhuah bakah, kawng siamna tur oil man atanga chhiah sang uchuak an khawn ngaihtuah chuan hei aia tha kawng neih hi an phu hle tih a sawi bawk.