Aizawl: May 28, 2026 atanga Synod Mission Board buatsaiha Central Region Missionary Retreat vawi 5-na, Luangmual Kohhran Biak Inah neih chu nizan khan a tiak.
Retreat-ah hian Rev. Dr. Rosiamliana Tochhawng, Executive Secretary i/c Mission etc. chu Speaker a ni a, thupuiah ‘Phuarna leh Hrehawmnain a hmuak che (Tirh 20:23)’ tih a ni.
Retreat tan zanah vantlang Pathian Biak Inkhawm neih a ni a. Inkhawm hi Rev. R. Lalhmingsanga, Mission Board Secretary-in a kaihruai a, Albert Lalhmangaiha, SMB Coordinator-in inhmelhriattirna leh SMB report a pe a, Synod Moderator Rev. John Raldosanga’n Keynote Address a sawi.
Inrinni khan thupui pahnih zir ho a ni a, chawhmaah ‘Mental & Physical Health Awareness’ tih thupui hmangin Upa Dr. C. Lalhrekima, Mission Veng paper buatsaih zir ho a ni a, chawhnu lamah ‘Tunlai India ram dinhmun thlir chunga rawngbawl zel dan tur’ tih thupui hmanga Rev. Dr. K. Lalchhuanawma, ATC paper zirho a ni a. Zan inkhawmah retreat speaker-in Pathian thuchah a sawi a. Zan inkhawm banah hian zai khawm a ni.
Inrinni chawhma lamah Legal Awareness with Alliance Defending Freedom hun hman a ni a. Chawhnuah inhlan tharna leh fakna inkhawm neih a ni a. Zan inkhawmah speaker-in thuchah a sawi a. Inkhawm banah zai khawm a ni.
Pathianni chawhma leh chawhnuah speaker hnen atangin thuchah ngaihthlak leh a ni a. Chawhnu inkhawmah missionary thi sunna hun hman a ni a. Zanah Rev. R. Lalhmingsanga, Synod Mission Board Secretary-in thuchah a sawi a, inkhawm banah zai khawm leh a ni.
Retreat-ah hian Central Region-a Mission Field pariat atangin missionary leh an chhungte mi 694 an kal a. Riak lut hi 590 leh langa kal mi 104 an awm.
Synod Mission Board hnuaiah hian Mission Field 21 awmin, thawktu mi 2,708 an awm mek a, January atanga April, 2026 chhungin ring thar 1,806 an hmuh belh tawh a ni.