Aizawl: MPCC District tlawhchhuah programme kal zelah, Inrinni khan Congress hruaitute chuan Kolasib district tlawhin Congress Party Tuirial Block I te nen Kawnpui Venglai Bazarah an inkawm.
An inkawmna hi MPCC Vice President RL Valla chuan hmanpuiin thu a sawi a, Pathian leh mipui zarah sorkarna an chang leh a nih chuan NLUP chu changtlung zawkin Congress chuan an kalpui leh dawn tih a sawi.
ZPM sorkar sawiselin RL Valla chuan, “ZPM chu enchhin sorkar an ni a, kum 2023 MLA inthlan dawna mipui hnena an inzawrhna nen an kal dan a inang ta lo em em a, Zoram mipuite ZPM sorkarah an beidawng mek a ni,” a ti.
He hunah hian MPCC General Secretary PC Laltlansanga pawhin thu a sawi bawk.
District tlawhchhuah programme-ah hian Congress hruaitute chu Kolasib District khaw hrang hrangah insemdarhin an fehchhuak a, an zingah hian Lalbiakzama (GS), James Thanghmingmawia (Chairman, SJ&ES), Lalhmachhuana (Chairman, EC), HC Zothanpara (Secy), S. Lalrinawma (Secy), MS Dawngliana (Secy), S. Thangliankhuma (State Organiser), Lalramzidinga (EM), leh Lalhruaisanga (Gen Secy, ADCC) te an tel a ni.