Aizawl: Thawhtanni atang hian Aizawlah zebra crossing kaihhnawiha dan bawhchhiate lakah Aizawl Traffic Police-in na zawkin hma an la dawn.
Thuchhuah an siamah Aizawl Traffic Police chuan khawpui hmun hrang hranga zebra crossing siamte hi mipui kea kalte him zawk nan leh traffic enkawlna a felfai theih zawk nana siam a ni a. The Motor Vehicles (Driving) Regulations, 2017 Rule No. 9 leh 22 (iv)-in a sawi angin, lirthei khalhtuten zebra crossing thlen dawnin fimkhur taka tlan muana kawng kân turte tana a hlauhawm leh hlauhawm loh an enlawk thin tur a ni, an ti a.
Zebra crossing-ah hian lirthei din khap tlat a ni a. Hei hian traffic jam laia din pawh a huam vekin pick & drop leh bungrua hlang/thlak chhung reilo tê pawh a huam tel a. Dan bawhchhiaa hmuhchhuah te chu The Motor Vehicles (Amendment) Act, 2019 Section 177 leh 184 hmangin na taka hrem an ni dawn tih an tar lang.
Aizawl Traffic Police-te chuan lirthei khalhtute chauh ni lo, ke-a kalte pawh kawng puia an kan dawnin fimkhur taka kawngpuite enchiang hmasa thin turin an ngen nghal bawk.